За училиштето

Основното општинско училиште „Крум Тошев”-Трубарево е изградено во 1959 година и од почетокот на неговата работа функционира како подрачно училиште на ООУ„Вера Јоциќ” во кое што наставата се изведува само од прво до четврто одделение. Со доградбата на училиштето во 1986 год. ООУ „Крум Тошев” почнува да функционира како основно училиште во кое што наставата се изведува од прво до девето одделение и како такво егзистира до денес. Името го добива во чест на истакнатиот професор на Филозофскиот факултет во Скопе - Крум Тошев. Трубарево е приградско населено место кое што се наоѓа во источниот дел на градот Скопје во општината Гази Баба. Граничи со населените места Хиподром, Гоце Делчев и Илинден. Трубарево има добра патна инфраструктура поврзаност со урбаниот дел на општината и градот а во негова непосредна близина поминува најголемиот автопат во Р.Македонија Е-75. Поврзаноста со градот е со повеќе автобуски линии кои поминуваат низ населеното место (52, 53, 54, 64,68).

OОУ „Крум Тошев” – н.м. Трубарево, Скопје е дел од единствениот воспитно - образовен систем со кој се уредува дејноста на основното училиште која што е од јавен интерес. Нашето училиште  според бројот на просториите, материјално - техничките и кадровски услови со кои располага, овозможува нормални услови за изведување на воспитно- образовната работа.

Училиштето се состои од три дела, тврда градба, кои меѓусебно се поврзани и прават една целина. Училиштето располага со 1040 м² внатрешно уредена површина со 3000 м² училишен парк кој што е хортикултурно уреден. Во состав на училишниот двор е спортската сала од најсовремен тип од 600 м² површина а училиштето располага и со едно мултифункционално отворено спортско игралиште.  Училишната зграда и фискултурната сала се поврзани со сопствено парно греење кое што е на нафта. Внатрешниот и надворешниот простор на училиштето се содржински и функционално уредени и нивната искористеност е максимална.

Од денот на формирањето, во основното деветгодишно училиште „Крум Тошев” па се до денес, имаат завршено повеќе генерации  а многу од нив имаат завршено високо образование и денеска завземаат или завземале истакнати функции во јавниот и општествениот живот.

http://oukrumtosev.mk/
https://www.facebook.com/%D0%9E%D0%9E%D0%A3-%D0%9A%D1%80%D1%83%D0%BC-%D0%A2%D0%BE%D1%88%D0%B5%D0%B2-OOU-Krum-Toshev-165868267619/